دہرادون، 8؍دسمبر (ایس او نیوز؍ایجنسی) ہماچل پردیش اسمبلی انتخابات کے نتائج کی تصویر آہستہ آہستہ واضح ہوتی جارہی ہے۔ ہماچل میں گزشتہ 35 برسوں سے جاری اقتدار کی تبدیلی کا رجحان ایک بار پھر دہراتا دکھائی دے رہا ہے۔ اس انتخابی جیت کے ساتھ ہی کانگریس ایک بار پھر پہاڑی ریاست میں واپس آگئی ہے۔

ساتھ ہی بی جے پی کی شکست کو پارٹی کے لیے بڑا دھچکا مانا جا رہا ہے۔ کیونکہ بی جے پی نے ہماچل میں اقتدار کی تبدیلی کے رجحان کو ختم کرنے کے لیے سخت محنت کی تھی۔ خیال رہے کہ ہماچل پردیش کی 68 اسمبلی سیٹوں کے لیے 12 نومبر کو ایک ہی مرحلے میں ووٹنگ ہوئی تھی۔ اس الیکشن کے نتائج آج جاری ہو رہے ہیں، نتائج کے مطابق کانگریس ہماچل میں حکومت بنانے جا رہی ہے۔

ہماچل پردیش کے انتخابی نتائج کے درمیان وزیر اعلیٰ جے رام ٹھاکر نے گورنر کو اپنا استعفیٰ سونپ دیا ہے۔ بی جے پی لیڈر جے رام ٹھاکر نے شملہ راج بھون پہنچ کر اپنا استعفیٰ گورنر کو سونپ دیا ہے۔

 ہماچل پردیش کے سبکدوش ہونے والے وزیر اعلیٰ جے رام ٹھاکر نے استعفیٰ دینے کے بعد  کہا کہ میں نے اپنا استعفیٰ گورنر کو پیش کر دیا ہے، عوام کی ترقی کے لیے کام کرنا کبھی نہیں چھوڑوں گا، ہمیں چیزوں کا تجزیہ کرنے کی ضرورت ہے۔ کچھ مسائل تھے جنہوں نے نتائج کا رخ بدل دیا۔ اگر وہ فون کریں تو میں دہلی جاؤں گا۔

ہماچل پردیش کے سبکدوش ہونے والے وزیر اعلیٰ جے رام ٹھاکر نے کہا کہ میں ابھی کوئی تبصرہ نہیں کرنا چاہتا۔ ہم اندازہ لگائیں گے کہ کہاں کوتاہی ہے، کئی بار ایسا ہوتا ہے کہ ایک دو ایشوز کی وجہ سے الیکشن کا سلسلہ متاثر ہو جاتا ہے۔ جمہوریت کی سب سے بڑی خوبی یہ ہے کہ رائے عامہ کا احترام کیا جائے۔ ہم نے عوامی رائے کا احترام کیا ہے۔ میں نے اپنا استعفیٰ گورنر کو پیش کر دیا ہے۔

الیکشن کمیشن کے 5 بجے تک کے اعدادوشمار کے مطابق 56 نشستوں کے نتائج جاری کر دیے گئے ہیں۔ جس میں کانگریس نے 35، بی جے پی نے 18 اور دیگر نے 3 سیٹیں جیتی ہیں۔ اس کے علاوہ اگر ہم ہماچل انتخابات کے حوالے سے شام 5 بجے تک کے ووٹ شیئر کی بات کریں تو کانگریس کو 43.90 فیصد، بی جے پی کو 42.99 اورعام آدمی پارٹیکو 1.10 فیصد ووٹ ملے ہیں۔

دوسری جانب ہماچل پردیش میں کانگریس کی جیت کے حوالے سے کانگریس صدر ملکارجن کھرگے نے کہا کہ ہم ہماچل پردیش جیتنے پر ووٹروں کا شکریہ ادا کرتے ہیں۔ہمارے مبصر جا رہے ہیں اور وہ فیصلہ کریں گے کہ گورنر سے کب ملاقات کرنی ہے۔ راہول گاندھی کی بھارت جوڑو یاترا اور پرینکا گاندھی کا شکریہ کیونکہ ہم ان کی وجہ سے جیتے ہیں۔